O sábado 13 de xullo, o Gaiás converterase no epicentro da música infantil e xuvenil coa celebración da VII edición do Festival de Bandas Infantís e Xuvenís de Galicia. Este evento, que reunirá ao redor de 550 músicos pertencentes a 12 formacións das provincias da Coruña, Lugo, Ourense e Pontevedra, busca destacar o talento dos novos intérpretes galegos.
Organizado pola Federación Galega de Bandas de Música Populares (FGBMP) en colaboración coa Consellería de Cultura, Lingua e Xuventude e coa Deputación da Coruña, o festival ten como obxectivo dar a coñecer o traballo das formacións máis novas das bandas de música galegas. Amosar o seu talento ao público é a mellor maneira de poñer en valor o esforzo e a dedicación diaria destes músicos.
O festival dará comezo ás 11:00 horas no Xardín do Teatro e prolongarase ao longo de todo o día. Esta xornada de convivencia está destinada a participantes menores de 20 anos, integrantes de 11 bandas seleccionadas por sorteo entre todas as formacións federadas da FGBMP, ademais da Banda Sinfónica Xuvenil Galega. Cada formación interpretará un repertorio seleccionado para a ocasión, que incluirá desde temas clásicos ata versións de pezas máis contemporáneas.
Este evento anual nace coa intención de crear un espazo onde os novos intérpretes poidan atoparse, establecer vínculos e xerar futuras sinerxías entre bandas. Ademais, pretende fomentar a educación na diversidade a través da música como linguaxe universal.
